19 ديسمبر
مرحب بالجميع التسجيل مفتوح ، ومرحب بعودة المنبر مجددا
يوميات بابا نويل ... حكاية متجددة
الفتنة
الموسيقى البصرية
مرحبا Guest [دخول]
أخر زيارة لك: 25-09-2017, 09:59 AM الرئيسية


المنبر العاميوميات بابا نويل ... حكاية متجددة

نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة

« الموضوع السابق | الموضوع التالى »
«
أقرا احدث/اخر مداخلة فى هذا الموضوع »

05-12-2016, 12:14 PM

TheBigBoss

تاريخ التسجيل: 13-11-2016
مجموع المشاركات: 14

تغير كلمة السر

يوميات بابا نويل ... حكاية متجددة

    بابا نويل جيب لي معاك موبايل ....
    بابا نبيل انا داير لاب توب ....
    اسمع يا عمك جيب لي معاك بلى ستيشن ...
    انا جيب لي معاك عروسة بتمشي ... وماما قالت دايرة توب سهرة تحضر بيهو عرس خالتي ، واختي نهى دايرة ليها كريم تفتيح.
    بابا ابوي قال ليك انت جاي من ياتو بلد عشان نوصيك وما تخمنا ساكت ...
    انا ما داير حاجة بس امي قالت ليك شوف لابوي طريقة خارجو من البلد دي ....
    ضحك باب نويل وهو يقرأ العينة من طلبات الهدايا التي تلقاها وقال وهو يضحك ديل قايلني صيني ، ورغم غلاء اسعار الطلبات لم يطاوعه قلبه تجاهلها خاصة انها اول زيارة له لهذا البلد الذي سمع بتعاسة شعبه ورفاهية مسؤوليه . وهكذا قام بتحميل هداياه ولم ينسى ان يحمل معه كتاب "كيف تتحدث اللغة العربية" وجهاز GPS خوفا من ان يضل في الفضاء و بكامل عدته وهيئته ووعاله توجه الى عاصمة ذلك البلد .
    لفت نظره وهو يمر بالمدن المختلفة اكثار نظر الناس الى السماء فظن ان لهم ارتباط وثيق بالسماء والدعاء ولم يدر بذهنه انهم يمارسون رياضة ابتدعوها تسمى "الدفاع بالنظر" وكذلك شاهد في معظم المدن التي مر عليها ليلا ان الناس يتقلبون كثيرا في نومهم وحك اجسامهم ، توقع انهم ربما يعانون من الحساسية حتى سمع احدهم يقول "والله الباعوض دا كرهنا العيشة وقطع لحمنا يلعن ابو دي بلد" فتمنى عندها لو كان قد جلب معه "كريم" للباعوض ليهديه لهولاء الغلابة ...
    وهكذا وصل العاصمة عصرا ولسخونة الجو فكر في خلع ملابسه ليحصل على بعض الهواء الا انه تراجع في اللحظة الاخيرة عندما تذكر الباعوض وانه قد قرأ سابقا انه تم جلد امرأة لارتدائها البنطال فخاف ان يتم اخذه ومحاكمته بتهمة الفعل الفاضح في الهواء الطلق وعندها لن ينقذه احد خاصة ان رحلته غير معلنة لاسباب المقاطعة الامريكية والاوروبية .
    وفي احد الشوارع "الميتة" عديمة الحركة هبط محاولا البحث له عن مكان للاستراحة والاستجمام قليلا وما ان استقر في الارض حتى سمع صوت صافرة ....تيييت تيييت .... تلفت يمنة ويسار خوفا من ان يكون قد نزل في ملعب كرة قدم اثناء مباراة نهائية فلم يرى سوى شخص يرتدي ملابس رسمية بيضاء يطالبه بالوقوف وعند وصوله بادره بالسؤال : هويا رخصك يا زول ؟ ....
    ايقن عندها انه امام رجل نظامي فتوقعه انه ربما يكون مسئولا عن تدقيق جوازات السفر وتأشيرات الدخول فأجابه متساءلا بعد ان فتح كتابه " كيف تتحدث العربية" .. أتقصد جواز السفر او الباسبورت ...
    العسكري:يا زول باظبورط شنو .. بقول ليك رخصك بتاعة الكارو السايقو في نص الزلط دا ، ما عندك قول ما عندي ما تضيع لينا زمنا وتعمل فيها ما فاهم وجاي من الاندلس، وبعدين ما رابط الحزام لشنو؟!!
    وحينما دقق الشرطي في عربة باب نويل ... فاجأه قائلا : وبعدين تعال هنا دا شنو سايق ليك غزلان ونعاج وغنم انت يا زول قايل روحك وين .. وين ترخيص الثروة الحيوانية عشان تتحاوم بالغزلان ديل ...
    وقبل ان يجيب استرسل العسكري قائلا ... وبعدين انت مهرب شنو دا شنو الشايلو في الكراتين دي ؟!!!! والله انت الليلة وقعتك سودة معاي
    فاجابه بعد صمت ... انا بابا نويل وهذه هدايا للاطفال
    العسكري ... بابا نويل لا بابا عبدو ، شايل ليك بضاعة ما مجمركة وسايق ليك كارو بدون رخصة وحيوانات بدون ترخيص وما رابط الحزام وماشي في نص الزلط وما عندك لوحة كارو خضرا ويمكن زاتو داخل بدون تأشيرة ، والله ياخ انا نفسي من زمان الم لي في زول زيك كدا ...اها يا ابو الشباب نمشي القسم ولا عندك راي تاني .
    فاجابه بابا نويل : ليس معي نقودكم
    العسكري..ما مشكلة مش معاك دولار .. ادفع خلصنا ولا نمشي القسم.
    وتحت اصرار بابا نويل على عدم الدفع لانه لا يحمل نقود تم اقتياده الى قسم الشرطة ، وفي دقائق كان يتبادله عدد من العساكر ، ليجد نفسه يساوم في كيفية مخارجة نفسه من هذه الورطة فبعضهم اتهمه بانه جاسوس اسرائيلي والبعض انه دخل بدون تأشيرة ومتنكر بهذه اللحية والبعض اتهمه بانه شيوعي يمارس التنصير وبعضهم انه يمارس التجارة بدون ان يدفع رسوم البلدية والمحلية ليجد ان التهم التي سمعها في نصف ساعة تتجاوز الثلاثين تهمة فاجابهم وقد ايقن سوء وضعه ... ما هو الحل اذن ...
    فاجابه احدهم ... والله قصتك دي صعبة خلاص اخو الرئيس زاتو ما بحلها ليك .. عندك مليون مشكلة ياخ ..
    بابا نويل ... هل يمكنني ان اكلم مسؤولا من الدولة...
    العسكري .... يا زول اخير ليك نحن .. المسؤولين ديل بعوقوك ساكت خلينا نحلها نحن برانا وتتخارج ...
    وتحت اصراره تم الاتصال باحد المسؤولين وبعد شرح تفاصيل القصة له اصدر توجيهاته بضرورة تحلل بابا نويل من كل الهدايا التي ضبطت بحوزته وارسالها لمنزل سعادته ومصادرة الغزلان والوعول لمزرعة سعادته والتبرع بالبدلة الحمراء للحزب الشيوعي والدقن الاصطناعية لامانة الحزب الحاكم والسماح له بالمغادرة بعد ذلك بعد استكتابه تعهدا..
    فخاطبه العسكري قائلا ...مش قلت ليك اخير ليك نحن اها شفت غزالاتك زاتهم ما حتلم فيهم ... يلا اقلع البالطو دا ووقع واتخارج لينا من هنا..
    وهكذا خرج بابا نويل من القسم عاريا "كطرزان" حزين على عدم ادخاله البهجة على قلوب الاطفال وجلس يبحث في صفحات كتابه حتى توقف في احدى الصفحات فضرب كفا بكف ونطق يقرأ بلغة عربية مكسرة .... حسبي الله ونعم الوكيل ...

    السؤال ... اذكر اسم البلد التي زارها بابا نويل ؟

05-12-2016, 05:17 PM

كوستاوي

تاريخ التسجيل: 12-10-2011
مجموع المشاركات: 2409

تغير كلمة السر

Re: يوميات بابا نويل ... حكاية متجددة (Re: TheBigBoss)

    Quote:
    السؤال ... اذكر اسم البلد التي زارها بابا نويل ؟


    هههههههههههه

    يطرشني ماسمعنا بالبلد دي


    دي قلبتا فيها هوبة


    حقو تعملها حلقات وتواصل لينا ياخ

    بالمرة خليهو يزور ناس المحلية وناس الزكاة
    وينتحر عند ناس الضرائب

05-12-2016, 09:51 PM

ابو هالة

تاريخ التسجيل: 10-07-2012
مجموع المشاركات: 319

تغير كلمة السر

Re: يوميات بابا نويل ... حكاية متجددة (Re: كوستاوي)

    يا كبير


    بنسلم عليك و قول ليك حبابك بينا
    وانت كانت جات متاخرة
    انا ذاتي جيت متاخر


    بين كل بقع ضوء ما وجدت غير ظلمتك احب الي نفسي منها يا وطني

05-12-2016, 11:17 PM

كوستاوي

تاريخ التسجيل: 12-10-2011
مجموع المشاركات: 2409

تغير كلمة السر

Re: يوميات بابا نويل ... حكاية متجددة (Re: ابو هالة)

    بيغ

    حركاتك دي مابتنفع معانا
    تجدعنا جدع وتتخارج وتجينا بعد اسبوعين

    رص الحكاية ياخ

06-12-2016, 09:24 AM

TheBigBoss

تاريخ التسجيل: 13-11-2016
مجموع المشاركات: 14

تغير كلمة السر

Re: يوميات بابا نويل ... حكاية متجددة (Re: كوستاوي)

    ان شاء الله ربك يهون ونكتر الجيات والجايات

06-12-2016, 09:22 AM

TheBigBoss

تاريخ التسجيل: 13-11-2016
مجموع المشاركات: 14

تغير كلمة السر

Re: يوميات بابا نويل ... حكاية متجددة (Re: ابو هالة)

    تسلم كتير ابو هالة وان شاء الله نكون اضافة وخفيفين على اهل المنبر

    ويسعدني مرورك

06-12-2016, 09:20 AM

TheBigBoss

تاريخ التسجيل: 13-11-2016
مجموع المشاركات: 14

تغير كلمة السر

Re: يوميات بابا نويل ... حكاية متجددة (Re: كوستاوي)

    هههههه حاول مرة اخرى وبنديك خيارات

الصفحة 1 من 1:   <<  1  >>

· دخول · ابحث · الملف الشخصي

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو منتدي السودانيين بل تمثل وجهة نظر كاتبها