19 ديسمبر
مرحب بالجميع التسجيل مفتوح ، ومرحب بعودة المنبر مجددا
يوميات بابا نويل ... حكاية متجددة
الفتنة
الموسيقى البصرية
مرحبا Guest [دخول]
أخر زيارة لك: 25-09-2017, 09:58 AM الرئيسية


المنبر العامالموسيقى البصرية

نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة

« الموضوع السابق | الموضوع التالى »
«
أقرا احدث/اخر مداخلة فى هذا الموضوع »

08-12-2016, 06:36 PM

حاتم ابراهيم

تاريخ التسجيل: 11-11-2016
مجموع المشاركات: 77

تغير كلمة السر

الموسيقى البصرية

    برنامج للتدوين الموسيقي (كتابة النوتة)

    يدعم 60 لغة من بينها اللغة العربية نسخة السودان.
    وندوز وماكنتوش ولينكس.

    https://musescore.org/


    _____
    البرنامج مجاني ومفتوح المصدر.

08-12-2016, 06:54 PM

محمد طه الحبر

تاريخ التسجيل: 12-10-2011
مجموع المشاركات: 2065

تغير كلمة السر

Re: الموسيقى البصرية (Re: حاتم ابراهيم)

    حاتم يا جميل

    تعال ورينا الاتخلاف شنو بين السلم والاخر في الموسيقي

    بالنسبة للنوته الموسيقيه بتتعمل لكل الآلات الموسيقيه ولا لبعض الآلات



    اكيد النوته بتجود الشغل

    وعندي تسجيل حوار لمصطفي سيد احمد ذكر فيهو جزء من الكلام دا


    تحياتي

08-12-2016, 08:00 PM

كوستاوي

تاريخ التسجيل: 12-10-2011
مجموع المشاركات: 2409

تغير كلمة السر

Re: الموسيقى البصرية (Re: محمد طه الحبر)

    سلامات حاتم

    ياخ انا قبل كده بالصدفة لميت ليك في زنجي بعزف ساكسفون

    لمن جسمي خدر والله التقول راكب فيلة


    اسه بفتش ليه تفتيش ما لاقيهو

    تقريبا كانت بعنوان
    أروع موسيقى تستمع اليها

08-12-2016, 08:09 PM

محمد طه الحبر

تاريخ التسجيل: 12-10-2011
مجموع المشاركات: 2065

تغير كلمة السر

Re: الموسيقى البصرية (Re: كوستاوي)

    Quote: التقول راكب فيلة


    قلت لي الناس ناس نفخ ساكت

16-12-2016, 01:54 PM

حاتم ابراهيم

تاريخ التسجيل: 11-11-2016
مجموع المشاركات: 77

تغير كلمة السر

Re: الموسيقى البصرية (Re: كوستاوي)

    Quote: ياخ انا قبل كده بالصدفة لميت ليك في زنجي بعزف ساكسفون

    سلام ناصر
    الأفارقة من أميز البشر في العزف على النحاسيات عموماً، الساكسوفون آلة مصممة للمارشات لكن وجدت طريقها بسرعة لموسيقى الجاز في نيوأورلينز مكان الزنوج فمن الطبيعي يبرعوا في عزفها، لكن المزاج المتوافق مع الآلة سببه إنها مزيج بين الكلارنيت ذي الصوت الرخيم والترمبيت بصوته الدافيء.

16-12-2016, 01:48 PM

حاتم ابراهيم

تاريخ التسجيل: 11-11-2016
مجموع المشاركات: 77

تغير كلمة السر

Re: الموسيقى البصرية (Re: محمد طه الحبر)

    Quote: تعال ورينا الاتخلاف شنو بين السلم والاخر في الموسيقي
    +++
    بالنسبة للنوته الموسيقيه بتتعمل لكل الآلات الموسيقيه ولا لبعض الآلات
    +++
    اكيد النوته بتجود الشغل

    سلام محمد طه
    السؤال كبير، لكن للتبسيط، فكرة تصنيف الموسيقى لسلالم (scales) ناتجة عن ظروف نشأة الموسيقى أيام الحضارة اليونانية كانت مزدهرة وكل مدينة عندها موسيقى مميزة، يعني التمييز بدأ جغرافي لكن انتهى علمي رياضي على أساس أن كل نوع من الموسيقى يتألف من مجموعة من النغمات يتم عزفها بترتيب مفضل في حالات مختلفة، اختلاف عدد النغمات وترتيبها بيحدد ما يعرف بالسلم.
    غني عن القول إنو السلم تلقائياً تحدده الثقافة في المنطقة بدرجة كبيرة، حاشرح بتوسع قريباً.
    +++
    النوتة الموسيقية نشأت كضرورة لتنسيق عمل الآلات مع بعضها، الموسيقى في العالم الغربي عمل جماعي ولما تكون عندك نفس الآلة مكررة (لغرض تضخيم الصوت) بتحتاج لوصفة تحدد لكل عازف يعمل شنو بالضبط في آلته، يعني زي الإرشادات المكتوبة، زمان مافي أجهزة تسجيل أو مكبرات صوت فلما تكون في حفلة موسيقية كبيرة مثلاً لازم يحرص الجميع على أداء متناسق، دا طبعاً الغرض المعاصر، لكن النوتة نشأت أصلاً لحفظ الموسيقى بصرياً على الورق، معظم الآلات الموسيقية يمكن عمل نوتة لها، برنامج ميوزسكور فيهو حوالي 200 آلة مصنفة لعشرة فئات، دي الآلات الشائعة لكن المتوفر من الآلات في العالم يتجاوز الآلاف، طالما أمكن تصنيف الآلة الموسيقية لأي من الفئات العشرة فمن السهل عمل نوتة لها.
    ++++
    النوتة تنظم العمل الموسيقي لكن ليس بالضرورة أن تجوده فمعيار الجودة تدخل فيه أمور أخرى مثل اللحن وطبيعة الآلات وصلاحيتها وكيفيات اختيارها ومسائل فنية أخرى مثل التوزيع والتسجيل.

    (عدل بواسطة حاتم ابراهيم on 16-12-2016, 01:55 PM)

08-12-2016, 09:53 PM

حاتم ابراهيم

تاريخ التسجيل: 11-11-2016
مجموع المشاركات: 77

تغير كلمة السر

Re: الموسيقى البصرية (Re: حاتم ابراهيم)

    سلام للجميع
    وضعت البوست لكن ما ظهر لقرابة ربع ساعة، فقلت أشوف شغلة تانية وأجي أحاول مرة تانية، المهم كويس إنو في مهتمين، أنا اتوقعت العنوان يكون مربك شوية.

    على أي حال دا باب في بوست اسمو الموسيقى كنت بديتو وناوي أكملو قبل أغسطس الجاي، المفروض يكون جزء من الموضوع الهنا، دا
    https://sudanmusic.wordpress.com/

    المقصود بالموسيقى البصرية ببساطة التمثيل البصري للموسيقى، يعني الطريقة البديلة لحفظها حسب المتوفر في الماضي أيام ما كان في أجهزة تسجيل، فالبديل هو الورق، للأسف معظم الكتب التي تتطرق للموسيقى تبدأ بالنوتة وكأنها أساس في الموسيقى مع إنو السمع هو الأساس، على أية حال اتمنى تطلعوا على المدونة أول وتجو تحاولوا تشوفو جورج هيس دا بيقول في شنو وتنزلوا البرنامج والعايز يشتغل عليهو بالواجهة العربية أنا حأوفر ليهو ملف مخصص لذلك، لأنو الدعم العربي ما حيتوفر إلا في الإصدارة التالتة للبرنامج (الإصدارة الحالية هي التانية).

    في الوقت الحالي أنا المسؤول عن الترجمة العربية للبرنامج والموقع، عصرتهم ليكم قلت ليهم العربي دا ذاتو خشم بيوت وحقنا اسمو (السوداني) ما أديتونا اسمنا ما بنشتغل بيكم، أنقروا ما جروا واطي

    أها، في الموقع دا
    http://www.transifex.com/musescore/musescore/
    لو ضغطوا على اللنك تحت اللغة الألمانية (Display all languages) حتلقوا العربي السوداني مكتمل بنسبة 86% فوق للصيني والكوري وباقي اللغات هيييع

    قمت بترجمة هذه الفيديوهات الإرشادية ويمكنكم اختيار للغة أخرى من الركن السفلي الأيسر، وياريت تدونا رأيكم في مدى وضوحها، لإظهار الترجمة العربية على الفيديوهات:



































    _____
    لو جادين ممكن تتعلموا النوتة في شهر ديسمبر دا

    (عدل بواسطة حاتم ابراهيم on 08-12-2016, 10:40 PM)

08-12-2016, 10:23 PM

محمد طه الحبر

تاريخ التسجيل: 12-10-2011
مجموع المشاركات: 2065

تغير كلمة السر

Re: الموسيقى البصرية (Re: حاتم ابراهيم)

    Quote: وضعت البوست لكن ما ظهر لقرابة ربع ساعة


    وحياتك متابعين ومنتظرين

    امسح الكاش حق المتصفح وما بتشوف بوست ماظهر

    الcloudflare فيهو خاصيه تشغيل الكاش وبتمسح كل ساعتين

    عشان كدا حتي لو نزلت بوست مابظهر الا بعد مسح الكاش التلقائي من الكلاود

    المهم وقفنا تشغيل الكاش وبيكون مربوط always online with server

    دا كلو عشان نقلل الباندويث الشهري

08-12-2016, 10:28 PM

حاتم ابراهيم

تاريخ التسجيل: 11-11-2016
مجموع المشاركات: 77

تغير كلمة السر

Re: الموسيقى البصرية (Re: حاتم ابراهيم)

    وندوز فالز


    _____
    حأرجع للإجابة على الأسئلة في وقت لاحق.

11-12-2016, 08:42 AM

أبو إيمان

تاريخ التسجيل: 13-11-2016
مجموع المشاركات: 357

تغير كلمة السر

Re: الموسيقى البصرية (Re: حاتم ابراهيم)

    حاتم سلام
    الكلام دا أثرني جدا (للأسف معظم الكتب التي تتطرق للموسيقى تبدأ بالنوتة وكأنها أساس في الموسيقى مع إنو السمع هو الأساس، )
    بسبب إني كنت وطول العمر بفهم هذا المعني لكن ما قعدت كتبته أو ناقشت فيه زول
    دايما فاهم أن الموسيقي معمولة للناس (بالضرورة معظمهم لم يدرس موسيقى بل ولا يعرف يقرأ ولي صديق يعتبر أمي (عملت ليه محاولة وبقى بقرا بصعوبة
    المهم هذا الشاب له أذن موسيقى عجيبة بيقول ما تسمعوا اللحن البره دا ----- أسمعوا الأصوات الوره إتخيل كان يطرب للنقرات الخفيفة وخفية)

    دا بتسموا شنو إنتو؟ طبعا أنا زيو في الموسيقي كعلم بس أهو بنسمع
    الحبر فتحت باب سمح

11-12-2016, 01:54 PM

حاتم ابراهيم

تاريخ التسجيل: 11-11-2016
مجموع المشاركات: 77

تغير كلمة السر

Re: الموسيقى البصرية (Re: أبو إيمان)

    Quote: الكلام دا أثرني جدا (للأسف معظم الكتب التي تتطرق للموسيقى تبدأ بالنوتة وكأنها أساس في الموسيقى مع إنو السمع هو الأساس، )
    +++
    المهم هذا الشاب له أذن موسيقى عجيبة بيقول ما تسمعوا اللحن البره دا

    سلام أبو إيمان

    الموضوع طويل وشيق وأنا آليت على نفسي أطرقه من عدة أبواب مختلفة مع ترك التمثيل البصري (النوتة) كآخر مورد لشرح جوانب الموسيقى (التي لا تحتاج لشرح أصلاً).

    حتى موضوع التمثيل البصري أتمنى مناقشته هنا بعفوية بدون تعقيدات، والمدخل بتاعك ممتاز جداً وياريت تكلمنا أكتر عن خبرتك وقصة الشاب دا.

    ونحاول نعقب ونربط الأمور مع بعضها.
    _____
    نسيت أحدد صفحة البداية في المدونة (أعمل على إكمالها الآن) هنا الموسيقى

12-12-2016, 02:05 PM

أبو إيمان

تاريخ التسجيل: 13-11-2016
مجموع المشاركات: 357

تغير كلمة السر

Re: الموسيقى البصرية (Re: حاتم ابراهيم)

    حاتم يا غالي
    تعرف الشاب دا بشتغل فران وإشتغل مساعد لوري لفترة -- كان ابوه غنيان لكن ضيعوا المال وزي ماقلت ليك --- إقعد إسمع وإقرب أضانه للمسجل - وإبتسم زي الطفل
    أتذكر كنا لمن نسمع ياجميلة ومستحيلة إضحك بعد تنتهي لاحظ بقول شنو :

    "غايتووو العازفين ديل إلا إمشوا إعملوا عمره للآلات دي وردي فكفكا ليهن"

    كابلي سنة 1995 عندما بدأت ذائقة الحس الفني تتشوه بأساليب الناس ديل سألوه عن تردي الموسيقى والكلمات والألحان (تدهور المستوى)
    قال كلام بسيط "إنتو بتركزوا على المبدع لكن الموضوع المتلقي تدهورت أذنه الموسيقية وأصبح يتقبل أي شي أمامه
    المهم لخص الأمر في كلمات ساهلة

    طيب : إذا كان المبدع عندنا يستحضر هذه النماذج من المتلقى دون النظر لأي عوامل أخرى
    لكان تطور الفن والغناء والإبداع إجمالاً
    إرتقى إرتقاءا فطريا منسجما مع مزاج الناس وحاجتهم للتطريب
    والإستئناس بالفنان والمبدع مخيلة وإحتكاكا مباشرا


    ونواصل

12-12-2016, 04:33 PM

محمد طه الحبر

تاريخ التسجيل: 12-10-2011
مجموع المشاركات: 2065

تغير كلمة السر

Re: الموسيقى البصرية (Re: أبو إيمان)

    سلامات حاتم وكل المتداخلين


    افتكر مافي شئ خرب الموسيقي الزمن دا غير آله سخيفه اسمها الاورغ عبرها ممكن تصدر كميه اصوت لآلات اخري


    زمان الغنا تلقي اوركسترا بامد البصر

    توزيع موسيقي مظبوط شديد


    وبجيك بتسجيل لمريم الاخري لمصطفي في 89 ح تلاحظ الموسيقي بالاوركسترا والشغل المظبوط النضيف بيكون كيف

13-12-2016, 09:32 AM

أبو إيمان

تاريخ التسجيل: 13-11-2016
مجموع المشاركات: 357

تغير كلمة السر

Re: الموسيقى البصرية (Re: محمد طه الحبر)

    والله يا الحبر لفتنا لحاجة حقيقة ما أديناها حقها في البحث
    الأورغن رخص تكلفة الغِناء والإغتِناء من الحفلات
    بالجد الأورغن خرب الذوق حيث يكتفي الحضور في حفلة نصف مضاءة بالرقص والنقيز
    والفنان المزعوم مهتم بالعداد
    حتى شاعت أغاني التهييج والعنصرية القبيلة بسبب هذه السهولة وعدم الدراية بأبعاد هذا السلوك النفعي غير المنضبط
    الكلام دا داير قعدة وفحص ودراسة

16-12-2016, 02:43 PM

حاتم ابراهيم

تاريخ التسجيل: 11-11-2016
مجموع المشاركات: 77

تغير كلمة السر

Re: الموسيقى البصرية (Re: محمد طه الحبر)

    Quote: افتكر مافي شئ خرب الموسيقي الزمن دا غير آله سخيفه اسمها الاورغ عبرها ممكن تصدر كميه اصوت لآلات اخري

    سلام محمد طه
    يبدو لي هنا المشكلة في التقليد، فأول العازفين دائماً هم الرواد في التأثير على الجدد، أذكر أول عازف استمع ليهو بالأورغان كان صلاح عثمان وبعده إبراهيم (مع حنان النيل) فهم كانوا موسيقيين قبل ما يكونوا عازفين بمعنى سعة إطلاعهم.

    أورغان ياماها (تايروس) دا حالياً عند معظم العازفين في السودان ومن الواضح إنو الإمكانات فيهو هائلة لكن العتب على العازفين.



    للأسف الأورغ آلة تتطور بسرعة أعلى من قدرة العازفين على مواكبتها، زي الكمبيوتر بالضبط، فغالباً لا تترك الخيار للعازف إلا أن يكون تحت قيادتها ودي مشكلة تانية، فالتعقيد يتطلب مهارة عالية للتعامل معها ودا غير مطلوب في مجتمعنا، كفاية شوية إيقاعات متكررة والباقي أصوات غريبة عشان تعمل حفلة، الحال من بعضه فبدون نقد حقيقي كلنا ممكن نصبح عازفين.

    لكن دا ما بيمنع إنو الآلات الإلكترونية ليها تأثير خاص لا يقل جمالياً عن الآلات التقليدية، دا كيتارو موسيقار على السينثايزر وهي آلة أصعب من الأورغ لدرجة بعيدة وواضح إنو متمكن فهو أصلاً يعزف خمسة آلات غيرها بمهارة عالية.



    هنا تلاحظ عدد الكيبوردات الكبير، ودا ما دلالة على المهارة لكن مطلوب للأداء، العازف بيضبط كل كيبورد مقدماً عشان أثناء العزف ما يحتاج لبرمجة المفاتيح أو الانتقال من استايل لآخر، دي أجهزة عايزة ثروة، فالعازف عندنا بيختار الطريقة الأسهل، يخلي الأورغ يعزف جانب كبير من الموسيقى في الخلفية ويتابع هو ببعض النغمات، فعلياً بيكون الأورغ هو المتحكم في العازف ومع قلة الخبرة والمعلومات الموسيقية ونقص الثقافة بنحصل على الموسيقى السودانية الحالية.


    __________
    لاحظوا هنا مافي نوتة.

    (عدل بواسطة حاتم ابراهيم on 16-12-2016, 02:46 PM)

21-12-2016, 01:18 PM

حاتم ابراهيم

تاريخ التسجيل: 11-11-2016
مجموع المشاركات: 77

تغير كلمة السر

Re: الموسيقى البصرية (Re: حاتم ابراهيم)

    ياني يعطي مثال أفضل
    ويتحدث هنا عن أن ضبط الكيبوردات يمكن أن يستغرق شهرين حتى الوصول للصوت المطلوب، هذا بالطبع مع معرفة مجالين (الكمبيوتر والموسيقى) ومعلومات كافية عن تقنيات الصوت وثقافة الموسيقى الفلكورية.



    لذلك فنحن نظلم الأورغ إن وضعناه في يد لا تحسن استخدامه، أو ربما لا تجد الوقت والمال للتعلم وإبراز الموهبة
    __________
    وبالمناسبة، ياني لا يقرأ النوتة الموسيقية أو يكتبها.

الصفحة 1 من 1:   <<  1  >>

· دخول · ابحث · الملف الشخصي

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو منتدي السودانيين بل تمثل وجهة نظر كاتبها